Itantandudo ni Senator Migz Zubiri ti total ban wenno naan-anay a panangiparit iti online gambling ditoy Pilipinas.
Inawagan ni Zubiri a maysa nga “silent epidemic” ti online gambling a natalna a mangisagsagmak kadagiti Pilipino, nangruna kadagiti agtutubo.
Babaen ti Anti-Online Gambling Act of 2025 nga impila ti Senador, maipawilen ti amin a klase ti online gambling ditoy pagilian, pakairamanan dagiti digital betting platforms, mobile applications, ken websites a mangipalaplubos iti panagpusta wenno panagtaya dagiti tattao babaen ti cellphone, tablets, wenno computer da.
Sakopen iti singasing a panag-ban ti local ken offshore-operated gambling sites a target dagiti Filipino user.
Nabilin met dagiti amin nga Internet Service Providers (ISPs), mobile network operators, ken digital platforms nga i-block ti access dagiti gambling website ken mapaikkat payen dagiti kapada nga applications iti las-ud ti 72 nga oras manipud iti nangipatulod ti abiso ti Department of Justice (DOJ) ken Philippine Amusement and Gaming Corporation (PAGCOR).
Maiparit payen ti panagisayangkat ti transaksyon mainaig ti online gambling kadagiti digital wallets ken payment service providers kas kadagiti credit cards, GCash, Paymaya, ken dadduma pay.
