LA UNION – Agpanpanawagan dagiti tour services nga itandudo koma dagiti turista iti ‘tour for a cost’ dagitoy idiay syudad ti Tagaytay, Cavite.
Iti pannakiuman ti Bombo Radyo kenni Allan Martin, administrator ti maysa a tour services a nakabase iti nasao a syudad, kinunana a dakkel iti maitulong ti ‘tour for a cost’ kadagiti padana nga adda iti industriya ti turismo tapno makasubbot iti nakaro nga epekto iti panagbittak ti bulkan Taal.
Inlawlawag ni Martin, imbes nga umawatda ti relief ket mas nasaysayaat nga idalan laengen dagiti turista nga agtartarigagay a makita iti catastrophe wenno didigra a gapuanan ti bulkan iti itedda a tulong babaen ti ‘tour for a cost’.
Sigen pay kenni Martin, in-inot metten a maiyur-urnos dagiti pagpasyaran idiay Tagaytay ken iti kinapudnona ket addan dagiti nakalukat a hotel ken dadduma pay a negosyo sadiay.
Natalged met iti agturong idiay Tagaytay malaksid kadagiti lugar idiay Batangas a banbantayan ti Phivolcs.
