Nababalaw iti video ni Samar Governor Sharee Ann Tan bayat nga agsalsala kadua ni Hermano Mayor Ruben Panaligan ken mapurpurwakan ti kwarta.
Napasamak daytoy iti maysa a testimonial dinner a naangay iti Samar Convention Center idi kallabes.
Segun kadagiti report, paset daytoy iti selebrasyon kagiddan iti pista ti probinsya. Ngem saan a nakalasat kadagiti sumagmamano nga observers, kangrunaan ta agdama a sumangsango dagiti sumagmamano a paset ti Samar kadagiti problema ti panaglayos ken kinarigat.
Palawag ti Samar provincial government, iti nagwaras a video ni Samar Governor Tan ket maipagarop nga ala kabayatan iti Hermano Night ti Catbalogan Fiesta ken paset ti tradisyonal a “Kuratsa” a simbolo ti panangisakit ken panagkaykaysa dagiti Waray.
Inlawlawag da pay nga amin a nagun-od manipud iti nasao a panagtitipon ket naipaay iti simbaan ken dagiti kapilya idiay Catbalogan City.
Kabayatanna, siguden a nagpalagip iti Bangko Sentral ng Pilipinas nga iti saan nga umno a panagaramat ti kuarta, kas iti panangiwaras kadagiti pampubliko nga okasyon ket mabalin nga agresulta iti multa wenno panakaibalud a sagudayen ti araraira a linteg.#
