LA UNION – Makumikom ita iti panagsagana ti kakaisuna a pulis ditoy Pilipinas a makipaset iti ultra trail marathon run a maangay idiay pagilyan ti Pransya.
Iti pannakiuman ti Bombo Radyo kenni PO2 Miguel Carraza ti Burgos Police Station idiay probinsya ti La Union, kinunana nga isagotna ti panagtaray kadagiti suldado ken padana a pulis a madama a makailablaban iti Maute terror group.
Ibilang met ti running cop kas inspirasyon iti panagsanayna iti ipampamatmat dagiti kakadduana a pannakabagi ti linteg a kinatured a lumablaban.
Agan-anus daytoy iti panagsanay tapno mapagballigian ti umadanin a labanna iti tay-ak ti sports tapno makaited ti pammadayaw para ti pagilyan.
Inton August 26 agingga September 3, 2017 ket tumapug ni Carranza iti Ultra Trail Mont du Blanc trail-running event idiay France.
Ti nasao a paay-ayam ket maysa kadagiti karigatan a foot race idiay kontinente ti Europa.
Ni Carranza ket maysa kadagiti nagasat nga atleta manipud iti 85 a pagilyan a makibalubal iti 170-kilometer run main event.
