SAN FERNANDO CITY, La Union – Manamnama a maiyemplementar ita a bulan iti Setyembre ti Tricycle Route Plan ditoy syudad ti San Fernando, La Union.
Maipalagip a naaddaan ti panagtataripnong ti City Government ken dagiti representative iti Tricycle Operators and Drivers’ Association (TODA) ken dagiti dadduma pay a stakeholders tapno tamingen iti implementasyon ti nasao a plano.
Napagsasaritaan iti nadakamat a panagtataripnong ti naaprubaran ken naadaptar a pagannurutan maipapan iti ruta, proposed terminals ken exemptions.
Kalpasan iti serye ti konsultasyon ken diskusyon a nangrugi idi pay Marso iti napalabas a tawen, naadaptar ti TRP idi Mayo 2021 babaen ti Sangguniang Panlungsod City Resolution No. 21-267 wenno ti Resolution Adopting the Proposed Tricycle Route Plan of the City of San Fernando, La Union.
Sumagmamano met a tricycle drivers ken pasahero ti saan a pabor iti implementasyon daytoy gapu ti naduma-duma a rason.
Agtultuloy met iti panagsarita ti City Government ken dagiti representative iti TODA para kadagiti posible a rekomendasyon mainaeg iti daytoy a banag.
Babaen ti Department of Interior and Local Government (DILG) kalpasan a naipaulog ti Memorandum Circular No. 2020-036 idi Pebrero 2020 a mangmanmandar kadagiti amin a Local Government Units a mangbukel ti draft ken mangiyemplementar ti Tricycle Route Plan.
Tarigagay ti TRP a maiyadayo ti peggad wenno aksidente dagiti pasahero ken tricycle drivers kabayatan ti panagdalyasat dagitoy iti national highway.
Maipalagip a sumagmamano metten nga ili kas ti Naguilian, La Union ti nangiyemplementaren ti Tricycle Route Plan.
