Binabalaw ni sigud a Senador Antonio ‘Sonny’ Trillanes IV iti Independent Commission for Infrastructure (ICI) gapo iti maipagarup a pannakapaayda nga imbestigaran da Davao City Rep. Paolo Duterte ken Senador Bong Go mainaig kadagiti alegasion ti korapsion nga addaan pakainaiganna kadagiti flood control projects.
Iti maysa a post iti social media idi kalman, kenuna ni Trillanes a rumbeng nga “agserran” iti ICI no agtultuloy a tagtagiawanen da dagiti alegasion kontra iti kongresista ken ti Senador.
Segun kenni Trillanes, ni Duterte ket saan a dimmalan kadagiti imbestigasion uray addaan ti nakatengga a ₱51 billion budget insertions, bayat a ni Go ket saan a napaayaban iti laksid dagiti alegasion a pakairamramanan ti pamilyana kadagiti kontrata nga aggatad ti million pesos manipud iti gobierno.
‘Kung hindi rin lang naman iimbestigahan ng ICI si Pulong na hindi sumipot sa hearing kasi meron syang 51 bilyon insertions; at si Bong Go na hindi man lang pinatawag kahit sya ay nagbigay ng almost 200 contracts worth 7 bilyon sa tatay at kapatid nya, eh tama lang na MAGSARA NA KAYO!’
Maipalagip nga idi Oktubre, in-highlight ti sigud a senador dagiti waragawag ti maysa a sigud nga opisyal manipud ti Department of Public Works and Highways a mangibagbaga a nakaawat ti distrito ni Duterte ti ₱51 billion nga alokasion para kadagiti flood control projects ken inallukoy dagiti imbestigador a suruten iti “paper trail” dagiti pondo.
Tinaggaysana dagiti reklamo nga insubmitir na iti Office of the Ombudsman kontra kenni sigud a Presidente Rodrigo Duterte ken kenni Senador Go a mangak-akusar kadakuada ti plunder ken graft.
Imbutaktak na pay idi dagiti kompania a kukua ti pamilia ni Go ket nakaala ti aganay ₱7 billion a kontrata manipud kadagiti proyekto ti DPWH iti uneg ti sumagmamano a tawen, nga addaan ti pakabuklan a 200 projects.
Kenunana, iti panangited ti kontrata kadagiti asideg a kabagian ket mailabsing iti linteg.
Kabayatanna, immunan a pinalibakan ni Cong. Paolo iti aniaman a pannakairamanna iti alegasion ni Trillanes ken inawagan iti ICI kas maysa a “propaganda factory” ti gobierno.#
