BR LA UNION – Inakusaran ni sigud a Senador Antonio Trillanes IV iti liderato ti Senado, iti sidong ti baro a Senate President a ni Senador Alan Peter Cayetano, a nangparnuay ti maipagarop a maysa a “constitutional crisis.”
Ti nasao a waragawag ket kasaruno ti nagbalin nga addang ti senado nga ipaayan ti protective custody ni Senador Ronald “Bato” dela Rosa tapno lapdan ti gandat a panangarestar ti National Bureau of Investigation (NBI) maiyannurot iti warrant nga inyetnag ti International Criminal Court (ICC).
Mangnamnama ni Trillanes a temporaryo laeng ti panagbaliw iti liderato ken masukatan met laeng tapno maisubli ti “kinasayaat ken dignidad” ti institusyon.
Impaganetget na nga awan ti legal a bileg iti naaprubaran a Senate resolution, a nangituding a rumbeng a mangirwar nga umuna ti warrant iti lokal a korte sakbay a bigbigen ti arrest order manipud iti foreign tribunal.
Segun kenni Trillanes, ti nasao a resolusyon ket simbolo laeng ti sentimyento dagiti mammanday linteg, ken saan a rumbeng nga agpannuray daytoy.
Nupay kasta, mabalin kunana nga usaren kas basaran para iti posible a pannaka-arestar ni Dela Rosa iti linteg ditoy pagilian iti Republic Act No. 9851 a mangdusa iti krimen kontra iti sangkatuan.
Dinakamat pay ni Trillanes iti ruling ti Korte Suprema a mangbigbig iti hurisdiksiyon ti ICC ditoy Pilipinas.
