Nagpakdaar iti grupo dagiti truckers ditoy pagilian a posible nga agkissayda ti biahe gapu iti agtultuloy a panagngato ti presio dagiti produkto ti petroleo.
Segun kenni Alliance of Concerned Truck Owners and Organizations Vice President Rina Papa, kiniddaw ti sektor ti 30 a porsiento a panagngato ti delivery rates iti umuna a lawas ti Marso.
Nupay kasta, uray no aprobaran daytoy dagiti kliyenta, mapasaranda latta ti nasurok kumurang 20 a porsiento a pannakalugi iti matgedanda.
Gapu iti daytoy, kenuna ti grupo a mapilitanda a kissayan iti operasion gapu ta dandani amin a mapastrekan ket mapan iti krudo.
Inlawlawag ti grupo nga awan ti planoda a mangisayangkat ti transport holiday, nangruna ta dagiti trucking laeng iti napalubosan idi nga agtultuloy iti kangitingitan ti pandemia.
No matuloy iti pannakakissay ti biahe, manamnama a maapektaran ti adu a negosio ditoy pagilian, karaman dagiti babassit ken dadakkel a negosiante.###
