Nangiyusuat ti administrasyon ni U.S. President Donald Trump ti kampanya tapno isina ken rakraken iti International Criminal Court (ICC), nga ibilbilang na a pangta iti soberania ti Estados Unidos.
Segun iti report, kenuna ni US Secretary of State Marco Rubio a saanen a bigbigen ti U.S. iti bileg ti ICC nga agimbestiga wenno mangusig kadagiti umili ken opisial ti pagilian.
Kenunana a naipasdek iti ICC tapno usigen iti kadadagsenan a panaglabsing, ngem maipagarup a saan a nagbalin a radikal ken sukdulan daytoy. Inpaganetget na met a saan a palubusan ti Trump administration a pangtaan ti korte dagiti opisial ti Amerika.
Innayon na pay a nabayagen a taktakderan da US President Donald Trump ken sigud a President George W. Bush nga awan ti autoridad iti ICC nga agimbestigar ken mangusig kadagiti Amerikano, kangrunaan kadagiti miembro ti militar.
Segun iti maysa nga State Department official a nagkedked nga agpainagan, karaman kadagiti maikonkonsidera nga addang kontra iti ICC iti panangipatungpal ti travel bans, rebokasion ti visa, panangpalawa ti sanctions kontra iti korte ken dagiti affiliated organizations daytoy, ken diplomatic pressure iti dadduma a pagilian tapno umikkat iti international tribunal.
Kabayatanna, inbaga ni ICC spokesperson Oriane Maillet nga awan pay ti komento iti korte maipapan iti nasao a saritaan.###
