Mamati ni US President Donald Trump a saan nga agbayag iti kabaruan a rinnanget iti nagbaetan ti Estados Unidos ken Iran kalpasan ti kaudian a panagsinnukat ti panangraut iti rehion.
Segun ken ni Trump, dandani kontroladon ti Estados Unidos ti Strait of Hormuz, kalpasan a dinadael ti militarda dagiti pasilidad ti Iran a pakairamanan dagiti kapasidad a mangikabil ti mines, radar ken missile systems.
Kinunana pay nga agtultuloy a natalged a makalaslasat dagiti barko iti nasao a napateg a ruta pangbaybay bayat nga inikkaten ti Estados Unidos dagiti mines nga impakat ti Iran.
Timpuar manen iti panaglalaban kalpasan ti panangraut ti Estados Unidos kadagiti military target ti Iran iti asideg ti Strait of Hormuz, a sinaruno ti panagibales ti Tehran kadagiti pasilidad a lokasion dagiti puersa ti Estados Unidos idiay Jordan ken dadduma pay a paset ti rehion.
Laksid ti kinuna ni Trump, agtalinaed a nangato iti tension gapu ta agpada nga agsinsinnukat iti Washington ken Tehran ti pangta ken panagatake, nga agtultuloy met a makaap-apektar iti panagdalan ti lana iti Strait of Hormuz.###
