Nangipakita ni U.S. President Donald Trump ti kellaat a panagbalbaliw ti takderna maipapan iti susikda iti Iran, manipud iti natangken a takderna maibusor iti ceasefire agingga iti pananglukatna iti posibilidad ti peace talks.
Kalpasan ti panangpangtana a rauten dagiti power plants ti Iran no saan a malukatan ti Strait of Hormuz, kenuna ni Trump a nakasaganan ti Iran a makitulag ken umab-abanten ti negosasion, nupay awan ti naited a detalye no siasino ti kasarsarita ti Estados Unidos.
Nupay kasta, inlibak ti Iran, iti panangidaulo ni Mohammad Bagher Ghalibaf, nga adda ti mapaspasamak a direkta a saritaan, ken impaganetget a nagsanud laeng ti Estados Unidos gapu iti panagbuteng iti posible a panagibales.
Laksid daytoy, sumagmamano a pagilian a kas iti Pakistan, Turkey, Egypt, ken Oman iti agtigtignay kas mangibabaet wenno mediators tapno maitandudo ti ceasefire ken masigurado ti natalged a panaglabas iti Strait of Hormuz — maysa a napateg a ruta para iti suplay ti langis iti lubong.
Maipagarup nga addan ti indatag ti US ti 15-point proposal, agraman iti pananglapped ti nuclear weapons program ti Iran ken dadduma pay a limitasion iti depensa, nupay saan pay a nalawag no awaten daytoy ti Tehran.
Kabayatanna, agtultuloy ti pannakikoordinar ti Estados Unidos iti Israel iti tengnga ti nagduduma a panggep ti gubat, bayat a saan pay a masigurado no siasino ti mangaramid ti maudi a desision iti biang ti Iran.
Iti laksid dagiti panagduadua, agtaltalinaed a positibo ni Trump nga agtungpal ti katulagan iti agdama a diplomatiko a panagregget tapno gibusan iti gubat.###
