LA UNION – Dackel unayen iti epekto kadagiti tricycle drivers ken uray kadagiti operators, iti nangato itan a presyo dagiti produkto petrolyo partikular ti gasolina nga isuti kangrunaan nga us-usaren dagiti traysikel iti panagpasada dagitoy.
Aminado ni Ricky Nolasco, TODA president ditoy siyudad ti San Fernando, a narigat iti birok ita kadagiti agpas-pasada ti traysikel, gaputi nangina a presyo ti gasolina, ken bimmassit ti iyaw-awid dagitoy a birok.
Iti presyo itan ti gasolina ket P73.73 kada litro.
Mangnamnama ni Nolasco a makaaramid iti epektibo a solusyon dagiti maseknan nga opisyal ti gobyerno seknan iti sangsangwen a problema ita ti pagilian maipapan iti nangina a presyo ti petrolyo, tapno makissayan iti bakbaklayen a rigat iti transport sector.
Immapela met ni Nolasco kadagiti tricycle drivers nga aganus dagitoy ken liklikan iti agsingir ti nangato wenno nalab-labes ngem iti maiparbeng a plete, tapno maliklikan ti pannakaidarum iti PACU ken panagmulta.
Ngem apreciaren ni Nolasco dagiti commuters a makaawat kadagiti tricycle drivers, nga agbay-bayad iti kalalainganna.
