LA UNION – Mapalubusanen dagiti turista manipud iti naduma-duma a paset iti Luzon a sumrek iti probinsya a La Union mangrugi inton bigat, Mayo 22, 2021.
Maiyannurot daytoy iti Executive Order No. 27 series of 2021 nga impaulog iti Provincial Government of La Union (PGLU).
Base ti nasao a pammilin ng inyatnag ti gpbyerno lokal, dagiti laeng napili a tourist spots iti probinsya ti mabalin a pagturongan dagiti turista ken nasken a sumurot dagitoy kadagiti minimum public health standards.
Sigun kenni Provincial Information Officer Adamor Dagang, kontrolado iti bilang a 700 a turista laeng ti mapalubusan nga umuneg iti La Union.
Maipalagip a naitantan ti panagserrek dagiti turista idi napalabas a bulan gapu ti nangato a bilang iti kaso ti COVID-19 a nailista ti probinsya.
Adda met dagiti naiyetnag a pagannurutan nga impaulog ti gobyerno probinsiyal para kadagiti sumrek a turista.
Impaganetget ti PGLU a saan a maipalubos ti DIY Travels kadagiti saan a residente ti La Union.
Mamati ti lokal a gobyerno a babaen iti panagpastrekda kadagiti turista iti probinsya kabayatan nga adda ti pandemya ken ti pannakasurot ti health protocols ket maysa a wagas tapno ininot a biyagen iti turismo ken ekonomiya.
Nangiruar met iti palagip ti PGLU kadagiti agtartarigagay nga agturong iti La Union maipapan kadagiti suruten a pagannurutan.
Umuna, nasken a planwen ken agpa-book iti uneg ti minimum a 5 working days iti pagdagusan a lugar iti probinsiya babaen kadagiti DOT Accredited La Union based travel and tour operator.
Sakbay iti tallo nga aldaw a sumangpet ti lugar ket nasken a negative a resulta ti RT-PCR Test ti turista nga ipresentarna iti border checkpoint tapno makauneg.
Maikaddua, nasken nga agaplikar ti travel request babaen iti ‘Tara Na Visita’ wenno ti visitor information and tourist assistance system babaen ti maysa a link a masarakan ti Facebook page iti PGLU.
Ti pannakaapruba ti application iti maysa a turista ket maiproseso iti uneg ti 48 nga oras.
Apaman a makasangpet dagiti turista iti probinsya ket nasken nga ipakitada ti QTP ken tourism one stop shop para iti pannakaberipika ken pannakaala ti tourist access pass a maaramat kadagiti establishimento a pagturungan dagitoy.
Kabayatanna, karaman kadagiti mapalubusan a summrek iti probinsya ket dagiti 15-65 anyos a turista ken saan met a mapalubusan dagiti addaan ti commorbidity wenno adda ti sagubanit, karaman ti masikog nga agpasyar.
