Temporario nga impaserra ti United Arab Emirates (UAE ) ti tangatang wenno airspace da ita a Marso 17 kas “exceptional precautionary measure” kalpasan a ma-intercept ti military dagiti missiles ken drones manipud Iran.
Sakbayna ket maysa nga Iranian drone attack ti nangpataud ti dakkel nga uram iti fuel tank sadiay Dubai International Airport.
Kasaruno ti kumarkaro a tensyon idiay Middle East — nu sadinno ket bombombaen ti Israel dagiti Iran-backed militants sadiay Lebanon ken bumalbales pay idiay Iran — ket nagsaknapen ti epekto na ti pakabuklan a Gulf region.
Pagdandanagan ita ti global energy crisis kasaruno met ti panagharang ti Iran sadiay Strait of Hormuz, rason nu apay ta dimmanon ti $100 iti kada bariles ti Brent crude oil.
Kabayatanna, agtaltalinaed a nakaserra iti Strait of Hormuz para ti Estados Unidos ken Israel, kasta met dagiti kaalyado da a pagilian. Agtultuloy latta dagiti drone ken missile attacks, pakairamanan ti kallabes a panagraut asideg Sea of Galilee nga awan met iti naipadamag a nadangran.
