Siniguro ti Philippine Ports Authority (PPA) nga adda iti naan-anay a port services ken naurnos a pasilidad iti amin a pantalan para kadagiti biyahero iti pakabuklan nga Undas exodus.
Segun kenni Philippine Ports Authority Spokesperson Eunice Samonte, daytoy ket iti tengnga ti namnanaem nga agingga dua a milyon a Pilipino nga agdudupudop kadagiti nadumaduma a sangladan, nga agawid iti bukodda a probinsiya.
Sakbay a nangrugi iti Undas exodus, insagana metten ti port management offices dagiti pasilidad nangruna kadagiti lugar a sigud a naapektaran iti nabiit pay a Super Typhoon Rosal, kas idiay Bicol Region ken iti Northern Luzon.
Segun kenni Samonte, binilinen ti Philippine Ports Authority iti port management a siguradwenda a dagiti pasilidad iti tunggal puerto ket agtalinaed a saan a maapektaran iti agtultuloy nga epekto ti El Niño, kas iti panangikabil iti umdas a bilang dagiti air-conditioning unit tapno matulongan dagiti pasahero a manglaban iti nakaru a kinabara ti panawen.
Kinuna ni Samonte nga adda kabaelan dagiti pantalan nga i-accommodate dagiti pasahero a posible a maipit gapu iti nadumaduma a rason, kas iti pannakakansela dagiti biyahe.
Agtultuloy a naka-alerto iti Philippine Ports Authority agingga maika-lima ti Nobiyembre, a manamnama a panagsubli dagiti rinibu a biyahero manipud kadagiti probinsiya.
