LA UNION – Nailista ti umuna a kaso ti African Swine Fever (ASF) ditoy La Union idiay Barangay Cadaclan, San Fernando City.
Daytoy ti kinumpirma iti Bombo Radyo La Union ni Dr. Flocy Decena, city veterinarian.
Naamwan a nasurok 30 a baboy dagiti natay, manipud iti maysa a pig farm.
Rimuar iti resulta ti test sample a positibo iti ASF dagiti natay a baboy, isunga dagus a naikali dagitoy iti kauneg a 6 feet, iti nasao met laeng a lugar.
Kabayatanna, ipatpatungpal met ita ti lokal a gobyerno kadwa da iti City Veterinary Office dagiti maiparbeng nga addang tapno malapdan iti lalo pay a panagwaras ti sakit dagiti baboy.
Maysa ditoyen iti maisay-sayangkat a disinfection ken nairut a checkpoint iti amin a behikulo a sumrek ken rumuar iti nasao a lugar.
