Nangisayangkat ti prayer rally ti United Senior Citizens Party list kakadwa dagiti dadduma pay nga organization ken asosasyon sadiay sangwanan ti Senate Building, iti tingnga’t aldaw idi kalman ti Lunes, Enero 20, 2025.
Maipalagip nga idi Mayo 21, 2024, inaprobaran ti Kamara de Representantes para iti maikatlo ken maudi a panagbasa iti House Bill 10423 para iti pannakaipasa ti gakat a monthly stipend nga aggatad ti P500 para kadagiti amin nga senior citizens ditoy pagilian.
Kalpasan laeng ti makalawas ket naiturong a dagos daitoy para iti panangtingiting met iti Nangatngato a pagpandayan-linteg.
Nupay kasta, agingga ita ket saan pay a na-calendar ti nasao nga gakat sadiay Senado.
Gapo iti kaawan ti aksyon wenno panangaprobar manipud kadagiti Senador sakbay iti adjournment ti Kongreso inton Pebrero 7, maisubli daitoy iti Kamara de Representantes para iti re-filing.
Nu mapasamak daitoy ket masayang amin a a nagrigatan dagiti Kongresista para iti gakat.
Sinegundahan ni Representative Milagros Aquino-Magsaysay iti United Senior Citizens Party list nga iti prayer rally ket timek dagiti amin nga senior citizen ditoy Pilipinas.
Kinunana a ti gakat ket partikular a dinakamat ti universal pension a mangbenepisyar kadagiti amin nga seniors kadagiti panawen a kasapulan da iti suporta manipud iti gobierno para iti pang inaldaw a taraon ken medisina.
Malidayan pay ni Congresswoman Magsaysay kasaruno ti panangpaganetget na a nabayagen nga idurduron na daitoy sadiay Kongreso ken idi agangay a naaprobaran, agpakpakaasi isuna iti Senado nga ipasa da metten ti gakat a para metlaeng ti pagimbagan dagiti natataengan.
Innayon na pay nga walo a bulanen daitoy nga matmaturog iti biang ti Senado ket nu saan pay a maipasa iti usto nga oras ket maisubli manen iti Kamara para iti refiling para iti panagtultuloy iti Kongreso.
Kamaudiananna, nupay mamati ni Magsaysay nga ti pannakatantan ti gakat ket saan a pumabor kadagiti seniors, agtaltalinaed a nangato ti namnama na nga isapuso dagiti Senador ti kiddaw dagiti United Senior Citizens iti intero a pagilian.
