LA UNION – Nabigbigen ti pulisya ti dua nga persons of interest iti napasamak a pammaltog a nakatayan ni sigud a Congressman Eufranio Eriguel idiay ili ti Agoo, La Union.
Segun kenni Supt. Marlon Paiste, Information officer ti Police Regional Office-1, dakkel iti maited nga tulong iti imbestigasyon ti nabukel nga special investigation task group dagiti saan pay a nainaganan nga persons of interest iti pannakarisot ti kaso.
Kaibilang kuna na kadagiti kitkitaen nga anggulo ti pulisya ti isyu iti politika gaputa siguden a napangtaan iti biag ti sigiud a mammanday linteg idi 2016 national election babaen ti panangpabettak ti IED iti convoy na.
Innayon pay ni Paiste, imbilin metten ni C/Supt. Romulo Sapitula, regional director ti PRO-1, nga amuen iti amin a posible nga motibo iti pammapatay.
Kabayatan na, iti likodan ti insidente ket tuloy ti eleksyon iti lugar nga nakapasamakan ti krimen ken mas lalo nga inirotan ti pulisya iti seguridad sadiay.
Immuna ditoy, rabii ti Sabado idi pinapatay dagiti nakabonete a lallaki ni Eriguel babaen ti agkakangato a kalibre ti paltog kabayatan a daytoy ket agbetbetla iti miting de avance.
Dua iti body guards na ti natay, kabayatan a walo ti nasugatan kalpasan a matamaan dagiti naiyaw-awan a bala.
