LA UNION – Addan ti nasayaat nga kasasaad ti tallo a Chinese national nga immuna a naipadamag a kabilang ti Patients Under Investigation (PUI’s) mainaeg ti 2019 Novel Coronavirus numan nainget latta nga imon-monitori ti Department of Health ditoy Region 1.
Iti pannakiuman ti Bombo Radyo kenni DOH Region 1 Director Dr. Valeriano Lopez, kinumpirma na a ti tallo nga PUI’s ket agkakabsat a babbae nga edad 1, 6, ken 11 anyos nga naggapu idiay Shanghai, China.
Segun pay iti opisyal, dagitoy ket agtaltalinaed nga nakaisolate iti pagagasan ken sumaysayaaten ti kondisyonda.
Nagturong laeng dagiti biktima ditoy probinsya agsipudta adda bisita da nga am-ammo dagitoy.
Kabayatan na, kinuna pay ni Dr. Lopez a dagiti nasao nga agkakabsat ket nagbiyahe idiay Manila to Cebu, Cebu to Bohol ken Bohol to Cebu to Manila to La Union.
Maipalagip, nagpakunsulta ti pamilya dagitoy iti La Union Medical Center idiay ili ti Agoo idi January 26, 2020 no sadino ditoy a naamuan nga addaanda ti panateng ken uyek ken dagud a naiyakar iti Ilocos Training Regional and Medical Center (ITRMC).
Agingga ti agdama ket agtaltalinaed a 2019-NcoV free ti sibubukel a Region 1.
