LA UNION – Naipaayan ti nasay-sayaat a pannakaitabon ken nabendisyunan pay iti bangkay ti maibilang a kangatuan a lider ti Communist Party of the Philippines New People’s Army (CPP-NPA) idiay Cagayan Valley Region, a natay iti napasamak nga engkwentro iti baetan ti militar ken NPA idiay Barangay San Mariano Sur, San Guillermo, Isabela idi March 15, 2021.
Iti pannakiuman ti Bombo Radyo La Union kenni Army Major Jekyll Dulawan, hepe iti public affairs office ti 5th Infantry Division (5ID) ti Philippine Army a nakabase idiay Gamu, Isabela, binigbig na iti natay nga NPA leader a ni Rosario Canubas alyas ‘Ka Yuni’ tubo idiay Mindanao ken maipagarop a naipatulod idiay Cagayan Valley tapno idaulwan ti rebelde a grupo sadiay.
Iti panangisayangkat ti militar iti hot pursuit operation, nasarakan da iti bangkay ni Ka Yuni a naikali iti narabaw nga abut idiay Barangay Dingading ti nasao met laeng nga ili.
Ginandat pay ti militar nga iyawid ti bangkay idiay Mindanao ngem saan a nagresponde iti pamilya daytoy.
Gaputi dayta, babaen iti tulong ti Armed Forces of the Philippines, San Guillermo Police Station ken lokal a gobyerno idiay San Guillermo, naipaayan ti naurnos a pannakaitabon iti nasao nga NPA leader.
Kabayatanna, nai-turnover iti pamilya da idiay Tabuk City, Kalinga iti bangkay ti agassawa nga agpada a high ranking official iti CPP-NPA.
Segun kenni Army Major Dulawan, inabandonar dagiti kakadwa da iti terorista a grupo iti natay nga agassawa nga isuda Rudy Daguitan alyas Pinpin, Political Officer/Political Instructor ken Nora Miguel alyas Gemay, agpapaay kas Medical Officer iti CPP-NPA, kalpasan ti engkuwentro iti baetan da iti 50th Infantry Battalion ti Philippine Army idiay Sitio Babacong, Barangay Gawa-an, Balbalan, Kalinga idi met laeng Marso 15.
Mainaig ti daytoy, naminsan manen a nagpanawagan ni Dulawan kadagiti nabatbati pay a miyembro ti CPP-NPA a sumuko ken agsubli iti sidong ti gobyerno, tapno saanen a maulit dagiti nasao a pasamak.
