LA UNION – Ituloy ita nga aldaw ti Coast Guard District Northwestern Luzon (CGDNWL) a nakabase ditoy San Fernando City, La Union a sapolen dagiti pito a mangngalap manipud Pangasinan a nagpataaw idi pay napan a lawas.
Iti eksklusibo nga interview ti Bombo Radyo La Union kenni Commander LAUREL PAUL MARIANO ti Coast Guard District Northwestern Luzon, kinuna na a nangisayangkat dan ti aerial surveillance ken maritime patrol and search operation ngem awan pay ti positibo a resulta.
Segun kenni Lt/Col. Mariano nga ita nga aldaw, ituloy ti BN Islander plane iti panangiganwat ti aerial surveillance ken iti BRP Lapu-Lapu (MMOV-5001) tapno sukisoken iti kabaybayan nga agpa-amianan.
Nupay nasurok itan a makalawas a mapukpukaw dagiti mangngalap, positibo latta ti Coast Guard a sibibiag pay dagitoy ken posible a naaddaan laeng ti problema iti nagluganan dagitoy a fishing banca nga FB Narem 2.
Immunan a nag-report iti PCG-Pangasinan iti akinkukua ti fishing banca a ni Christine Macaraig, kalpasan a napaay a makasubli dagiti pito a mangngalap kabilang iti Boat Captain a ni Alberto Roldan, iti lugar da idiay Infanta idi Enero 14.
Dagiti mapukpukaw a mangngalap ket pakaibilangan da: Roderick Montemayor, Homar Maglantay, Ejay Dela Cruz, Jerome Maglantay, Larry Legaspi, ken Jefferson Bernabe.
