LA UNION – Kaso a murder iti naidatag kontra iti uppat a suspek a maipagarop a responsable iti pannakapapatay ni RTC Judge Mario Anacleto Bañez a nakadestino idiay Tagudin, Ilocos Sur.
Naidatag ti kaso iti sala ni Atty. Robert F. Fangayen, Associate City Prosecutor, City of San Fernando, La Union.
Dua kadagiti uppat a suspek iti ninaganan ni Pol. Col. Jay R. Cumigad, La Union Police Provincial Director ken SITG Bañez head.
Dagitoy ket nabigbig nga isuda Napoleon Taliño ti Becques, Tagudin, Ilocos Sur a makunkuna a mastermind ken iti gunman a ni Vladimir Binayug Arcain a.k.a KIDLAT, residente ti Bahay Turo, Quezon City.
Iti maikatlo a suspek a maysa a babae ket saanen a ninaganan ni Cumigad gaputa posible nga agbalin a testigo bayat a ti maikapat ket agtaltalinaed a ‘John Doe’.
Kinuna iti Bombo Radyo La Union ni Col. Cumigad, nabigbig dagiti suspek base iti naala ti CCTV a naipatulod ken naamiris idiay Camp Crame.
Kabayatanna, nagkedked ni Cumigad a sungbatan iti salodsod nu anya ti motibo iti napasamak a krimen.
Maipalagip a pinaltugan ti riding-in-tandem suspects ni Judge Bañez bayat nga agawiden iti balay da idiay Barangay Dallangayan Oeste ditoy syudad bayat a nakalugan ti kotse na, iti Barangay Mameltac road idi Nobyembre a-5 agdama a tawen, a makagapo ti dagus a pannakatay daytoy.
