BR LA UNION – Umaboten ti nasurok 180 wenno nababa a 200 dagiti natay ken aganay 1,000 dagiti nasugatan iti napasamak a nagsaruno a napigsa a gingined idiay Venezuela.
Naamwan a timmama iti magnitude 7.2 a gingined idi malem ti Huwebes (aldaw ditoy Pilipinas), nasurok kumurang 160 kilometer idiay Caracas.
Kalpasan ti awan pay maysa a minuto, napasarunwan manen ti maysa pay a napigsa a magnitude 7.5 a gingined a nakarsuodan ti sumagmamano a pasdek ken imprastraktura iti lugar.
Segun kenni Interim President Delcy Rodriguez, nakitinnulongen ti gobyerno kadagiti pribado a kompanya tapno usaren dagiti dadakkel nga equipment para iti naparpartak a panagsapol ken panangisalbar kadagiti biktima.
Nakaru a naapektaran ti gingined idiay La Guaira, maysa a probinsiya asideg iti kabisera ti Caracas a pakasarakaan iti kangrunaan nga airport iti siyudad .
Nalawa ken nakaru a perdisyon ti napasamak met laseng idiay Morón, Carabobo, nga asideg iti sentro ti gingined.
Adu pay a babbalay ti narsuod ken napukawan ti suplay ti kuryente ken danum kadagiti residente sadiay.
Inpadamag ti lokal a gobyerno a karaman kadagiti natay iti tallo nga ubbing.
Ballaag ti U.S. Geological Survey, posible pay a ngumato iti bilang dagiti natay bayat nga agtultuloy ti seach and rescue operation kadagiti mapukpukaw.
Mapatta-patta a rinibu dagiti mabalin a naapektaran ti dua a napigsa a gingined kalpasan a kinumpirma dagiti nagduduma a lider ti nasao a pagilian a saan a lumbes ti 10,000 a tattao iti saan pay a nabirokan wenno mapukpukaw.
Kabayatanna, nagpatulod metten ti Estados Unidos iti search and rescue team, ken isag-sagana metten ti gobyerno da iti kanayunan a tulong para kadagiti nakaru a nadidigra a lugar idiay Venezuela.
