LA UNION – Naminsan manen nga inarestar dagiti otoridad iti maysa nga ina a maibilang nga HVT level 3 iti drug watchlist ti PDEA kalpasan a nakumpiskaran iti lima a pakete ti maipagarop a napagango a bulong ti marijuana.
Nabigbig iti kangrunaan a suspek a ni Melissa Ganuelas, 37, agtrabtrabaho kas call center agent, ken residente ti Barangay Ilocanos Norte, San Fernando City, La Union.
Kadwa na a naaresto iti buy bust operation dagiti otoridad, iti dua nga annak na isuda: Dyken Frosth Ganuelas, 19, ken Lynux Dylan Ganuelas, 16, ti Barangay Ilocanos Norte ditoy syudad; agraman ti managan Christian Paul Munar, 17, ti Barangay Casilagan, San Juan, La Union.
Naamwan ti Bombo Radyo La Union kenni PDEA Region1 Spokesman Bismarck Bengwayan, a malaksid a drug pusher dagiti naaresto, maipagarop a drug user pay dagitoy, base kadagiti nakumpiskar da ken kaus-usar a drug paraphernalia.
Kinapudno na segun kenni Bengwayan, karuruar na laeng iti pagbaludan ni Ganuelas gapu met laeng iti kapada a kaso, iti RA 9165.
Malaksid dagiti nakumpiskar a marijuana, kinumpiskar pay dagiti otoridad iti maysa a pidaso ti P500 bill a nagserbi a buy bust money, uppat a cellphones, ken drug paraphernalia.
Base iti report, 20 a gramo iti maipagarop a kadagsen dagiti nakumpiskar a droga ken mapatta-patta nga agbalor dagitoy ti P2,000.00
Dagiti suspek ket sumangsango iti kaso a panaglabsing iti Art II, Section 5, 11, &12 ti R.A. 9165 wenno Comprehensive Dangerous Drugs Act.
Iti ag-ina a Melissa ken Dyken ket adda iti custodiya ti PDEA bayat a dagiti dua a menor de edad ket temporaryo a maitalek iti DSWD para iti umno a disposisyon.
