LA UNION – Nakatuding nga idatag ti pulisya iti piskalya ti kaso a pammapatay kontra ti suspek a nangpapatay ti bukodna a kabsat idiay Barangay Quirino, ili ti Bacnotan, La Union.
Sigun kenni C/Ins. Reynaldo Soria, hepe ti Bacnotan Police Station, napigsa dagiti ebedensya ken uray ti testimonya dagiti nakaimatang ti krimen kontra ti suspek a ni Jeric dela Cruz.
Base iti testimonya dagiti nakaimatang kinunana, kada maipagarup a bagsulen ti suspek ti inauna a kabsatna a ni Jeffrey ket iyasana ti iggemna a patadem.
Idi a nakadasayen ti biktima ket imparangguyod ti suspek iti bagi daytoy idiay igid ti baybay ken imbatina sadiay kasaruno ti panaglibasna.
Napaay met dagiti residente nga anawaen ti suspek gapu iti buteng nga isuda ket mabagsol.
Immuna iti daytoy, maipagarup a sakbay a napasamak ti krimen ket nakaunget ti suspek nga adda ti impluwensya iti arak kontra ti biktima kalpasan a mabagbagaan daytoy kasaruno ti awan sarday a panangbagsol.
Nakabalud pay ita idiay kwerpo ti pulisya ti suspek kalpasan a simmuko met laeng daytoy.
