LA UNION – Binigbigen ti Tarlac City Police Station dagiti pimmusay iti panagdinnungpar ti van ken parapasahero a bus idiay Brgy. Aguso, Tarlac City.
Maibasar iti nakalap nga impormasion ti Bombo Radyo La Union ken ni P/Insp. Wilhemino Alcantara, imbestigador ti Tarlac City PNP, dagiti biktima a naideklara a dead on arrival ket da Jemor Bueno, 58-anyos, ti Leones West Tubao, La Union, driver ti Hi-Ace van; ken dagiti pasaherona a da Teresita Basadre, Silvestre Basadre, Lolita Marzan ken Andrea Duran, agpapada met laeng a taga-Tubao.
Agtultuloy met a maag-agasan iti Tarlac Provincial Hospital dagiti dadduma a pasahero ti van ken ti nakadinnungparna a bus.
Iti agdama ket tengngel dagiti otoridad ken agtultuloy a maim-imbestigaran ti driver ti Santrans bus a ni Pepito Dela Luna, 55, a residente ti Caingin, San Rafael Bulacan.
Immunan a kinuna ti pulisia nga agturturong iti abagatan a direksion ti van idi naidungpar daytoy iti bus manipud iti kasunganina a direksion a nagbanag iti panagdinnungparda.
Malaksid kadagiti dua a lugan ket nairaman pay a nadungpar ti maysa a balay iti igid ti national highway ken maysa a tricycle a nakaparada iti compound. (PLAD)
