Nabigbigen ti Tarlac City Police Station dagiti pimmusay iti panagdinnungpar ti van ken parapasahero nga bus iti Brgy. Aguso, Tarlac City.
Iti impormasyon a nakalap ti Bombo Radyo La Union manipud kenni P/Insp. Wilhemino Alcantara, imbestigador ti Tarlac City PNP, dagiti biktima a naideklara nga dead on arrival ket da Jemor Bueno, 58-anyos, ti Leones West Tubao, La Union, driver ti Hi-Ace van; ken dagiti pasahero a da Teresita Basadre, Silvestre Basadre, Lolita Marzan ken Andrea Duran agpapada a taga-Tubao, La Union.
Agtultuloy met a maag-agasan iti Tarlac Provincial Hospital ti dadduma nga pasahero ti van ken nakadinnungpar na a bus.
Iti agdama ket iggem dagiti otoridad ken agtultuloy nga im-imbestigaran iti driver ti Santrans bus a ni Pepito Dela Luna, 55, a residente ti Caingin, San Rafael Bulacan.
Immunan a kinuna ti pulisya nga agturong iti abagatan a direksyon ti van idi dimmungpar daytoy iti bus manipud iti kasungani a direksyon a nagresulta iti panagdinnungpar.
Malaksid iti dua a lugan ket nairaman met ti maysa nga balay iti igid ti national highway ken maysa pay a tricycle a nakaparada iti compound. (PLAD)
