LA UNION – Saan pay ita a masinunuo dagiti otoridad no asino ti makinkukua iti bilog nga inusar ti maysa a mangngalap manipud Samar a naisar-ong ditoy siudad ti San Fernando.
Inlawlawag ni PSI Marissa Patacsil iti San Fernando City Police Station, a saan ngamin ita a sigurado no naggapuan ti nadakamat a bilog.
Segun kenkuana, mismo a dagiti kabagian ni Arnel Robin Regino a taga-Brgy. Losa, Samar, ti nagkuna a saanna a kukua ti nadakamat a bangka.
Gapu iti daytoy, agtaltalinaed a nakasanglad iti Brgy. Poro ti bilog bayat a nakaawid metten ti mangngalap kalpasan a sinukon dagiti kabagianna.
Ni Regino ket nasarakan iti kabaybayan idi June 11 kalpasan a naibusan iti gasolina ti naglugananna a bilog.
