Iti likodan ti pananggulib ken pannakitaray ti bukod nga misis iti marijuana cultivator iti ili ti Santol, La Union nakasagana daytoy a pakawanen ti mister na.
Iti pannakiuman ti Bombo Radyo iti 46-anyos a mister a ni Freddie Lagawen, kinuna na a boluntaryo nga agsubli kenkuana ken kumiddaw ti pammakawan iti 42-anyos nga asawa a ni Nora ket sipupuso na daytoy nga awaten.
Iti kinarigat ti biag iti panagnaed iti bantay kuna na, iti rason no apay a pinanawan isuna ti misis ken simmurot iti 46-anyos a marijuana cultivator a ni Rufino Lagadeo ti Barangay Badeo, Kibungan, Benguet.
Iti agdama, segun kenni Lagawen ket tuloy iti panangidatag na ti kaso nga pannakikamalala wenno adultery kontra iti bukod nga asawa ken iti kamalala daytoy.
Nagistorya met ti mister maipapan iti panangsapol kadua na dagiti pulis iti misis na.
Kinuna ni Lagawen, a pinauna isuna a nagna dagiti pulis a sumang-at iti bantay a paglimlimmengan ti agkamalala.
Mapagatapan nga agnanaig iti misis na ken ti makunkuna nga lover na iti marijuana plantation gaputa nakita na a nagiddanda a nangipangato ti pagan-anay dagitoy kasaruno iti napartak a panaglibbas da.
Immuna ditoy, umabot iti aganay P9 million iti balor ti nasao nga marijuana plantation ti naan-anay a dinadael ti pulisya iti boundary ti kabantayan nga paset ti Barangay Sapdaan, Santol, La Union ken Barangay Mocgao, Kibungan, Benguet.
Sakbay a madiskobre ti nasao nga pagmulaan ti marijuana nakaawat dagiti kameng ti Santol Police Station ng tireklamo manipud iti mister gapu iti pannakikamalala ti asawa na iti marijuana cultivator.
Gapu iti panagsapsapol iti agkamalala ket saan a ninamnama dagiti mangibagi ti linteg a maduktalanda iti nalawa a pagmulaan ti marijuana iti bantay.
Malaksid iti kaso a pannakikamalala, isagsagana metten ti pulisya ti kaso a panaglabsing iti Comprehensive on Dangerous Drugs Act wenno Republic Act No. 9165 ken illegal possession of ammunition kontra kadagiti suspek gapu iti panangywan kadagitoy iti marijuana plantation nga adda kalawa a 1,600 square meters ken panagikot ti uppat nga pidaso ti bala ti paltog.
