LA UNION – Kanayon a pumanaw iti Brgy. Cabaroan ditoy siudad ti San Fernando ti natay a drug pusher iti naisayangkat a buy bust operation idiay Brgy. San Francisco idi rabii, isu nga awan ti rekord ti naganna iti lugarda.
Daytoy ti palawag ni Cabaroan Brgy. Captain Charlie Galvez kalpasan a naamuan a maysa a newly-identified drug personality ti napapatay a ni Juna-ed Darimbang, 29-anyos, addaan it asawa, ken tubo iti Marawi city.
Segun ken ni Galvez, agnanaed met laeng iti Muslim Center ni Darimbang iti las-ud ti lima a tawen ngem kanayon a pumanaw gapu iti trabahona nga aglaklako iti nagduduma a produkto.
Inaklonna met nga adda ti lima a pamilya manipud Marawi a dimteng iti lugarda idi laeng bulan ti Hunyo a saan a nagpaipasidong iti survey ngem saan a karaman ditoy ni Darimbang.
Naklaat met ti barangay kapitan gapu ta siguden a naideklara ti lugarda kas drug-free.
Kabayatanna, linawlawagan ita ni PSI Marissa Patacsil, pannakangiwat ti San Fernando City Police Station a naduktalanda a maysa a drug pusher ni Darimbang babaen met laeng ti immunan a nakemmeg a drug personality nga addaan iti contact ti napapatay nga indibidual.
Maipalagip a nakumpiskar iti operasion ti tallo a sachet a naglaon iti shabu, buy bust money, cal. 38 a paltog nga inusar ni Darimbang ken ti naglugananna a motorsiklo.
Kabayatanna, immapela ita ti presidente ti La Union Muslim Community a ni Allan Macapundag kadagiti kakaduada a Muslim nga iyuman kenkuana no adda ti am-ammoda nga agar-aramid iti illegal.
Segun ken ni Macapundag, bambantayanda a naimbag dagiti kakaduada tapno isudan a mismo ti mangpakdaar tapno agsardeng iti illegal nga aramid kas iti maiparparit a droga.
