LA UNION – Blangko pay laeng dagiti otoridad it pakabigbigan dagiti tallo a babbai a naibelleng iti maysa a dike iti deppaar ti Kennon Road idiay ili ti Rosario, La Union idi agsapa kalman.
Iti pannakiuman ti Bombo Radyo iti hepe ti pulisia a ni PCI Bernabe Oribello, inlanadna nga awan pay laeng ti immasideg kadakuada seknan kadagiti nasarakan a bangkay.
Nupay kasta, naamuan iti medical examination nga insayangkat ti Scene of the Crime Operation (SOCO) a sangapulo nga orasen a natay dagiti tallo sakbayda pay a nasarakan ken suffocation ti makagapu iti ipupusayda kalpasan a nabalkot iti packaging tape ti rupa dagiti dua bayat a ti maysa ket adda ti tama ti pammagsol iti tengngedna.
Patien ni Oribelo a taga-lowlands dagiti biktima gapu kadagiti langa dagitoy.
Agtaltalinaed met a blangko ti pulisia iti motibo ken responsable iti pammapatay.
Maipalagip a nasarakan laengen iti agsapa kalman idiay Barangay Bangar dagiti tallo a bangkay kalpasan a naibelleng babaen kadagiti saan pay a nabigbig a suspek.
Immunan nga inladawa ti pulisia dagiti bangkay a nakasuot iti maroon t-shirt, colored black polka dotted shorts, kulot ti buokna ken agtayag iti 4”11′ ken mapatta-patta nga agtawen iti 30-40.
Ti maysa met ket nakasuot iti black sweat shirt nga addaan it white stripes, blue maong pants, kulot ti buokna, medium built, nakasuot iti silver a singsing ken agtayag iti 4″10′ ken agtawen iti 40-45.
Kabayatanna, ti maudi a biktima ket nakasuot iti sky blue sweat shirt ken gray shirt, colored blue maong pants, medium built, wavy hair, nakasuot iti kuwintas, ken agtayag iti 5″1′, addaan pustiso ken agtawen iti 30-40.
