LA UNION – Dagiti engkanto ti simmanib iti 12 nga estudyante ti junior ken senior high school iti Castor Z. Concepcion Memorial National High School iti Barangay Antonino idiay ili ti Balaoan, La Union.
Iti pannakiuman ti Bombo Radyo iti albolaryo a ni misis Esper Obor, residente ti Barangay Busel-busel idiay ili ti Luna, kinuna na a pamilya ti kapre, white lady ken dadduma pay nga pinarsua nga agbabaed iti waig wenno dan-aw no sadino a nagdidigos dagiti nasao nga estudyante.
Segun kenni Obor, saan met nga maibaga a naranggas dagiti nasao a pinarsua laketdi saan nga isuna nga mariribuk agsipudta kabaelanda iti bumales.
Sakbay iti nadakamat nga pasamak, nagiinnawid idi aldaw ti Biyernes dagiti estudyante nga agdigos idiay waig wenno dan-aw idiay Barangay Nagsabaran Sur iti nasao nga ili idi maipagarop a nagbarsak ken naglalaaw dagiti estudyante asideg iti puon ti kayo ti balete ken maipagarop nga adda natamaan nadangranda nga naidumduma a pinarsua.
Innayona na pay a mabalin nga bales daytoy dagiti dakes nga espiritu gapu iti panangbubulabog dagiti estudyante iti pagnanaedan dagitoy isu nga inaramid da iti nanglugan kadakuada.
