LA UNION – Naklaat dagiti gagayyem ken makaam-ammo kenni Judge Mario Anacleto Bañez, iti kellaat a pannakatay daytoy kalpasan a pinaltugan dagiti mapapati a riding-in-tandem iti Barangay Mameltac, San Fernando City, La Union pasado alas 5:00 idi malem kalman.
Segun iti sumagmamano a makaam-ammo kenni Judge Bañez idiay Alilem, Ilocos Sur masdaaw da iti napasamak agsipudta iti pannakaam-ammo da iti biktima ket nasingpet a tao ken kinapudno na, maysa daytoy a seminarian.
Ni Bañez,53 ket sigud a nagserbi kas Acting Judge iti 13TH MCTC iti Alilem-Sugpon idi 2007-2011, nagbalin pay a Judge iti 12TH MCTC iti Tagudin-Suyo idiay Ilocos Sur sakbay a nadutukan kas RTC Judge idiay Tagudin, Ilocos Sur.
Maipalagip a tinambangan dagiti saan pay a nabigbig a suspek iti biktima idi agawid koman daytoy bayat a nakalugan iti kotse na.
Naiturong iti Bethany Hospital ditoy syudad ngem gapu iti nakaru a tama ti paltog a sinagaba daytoy ket pimmusay met laeng.
Kabayatanna, mangisay-sayangkat iti nairut nga imbestigasyon dagiti otoridad tapno duktalen nu adda pakainaigan na iti trabaho wenno personal iti motibo ti pammapatay kenni
Judge Bañez.
Maysa pay nga ad-adalen ita dagiti otoridad ket iti naala a CCTV footage iti lugar a nakapasamakan ti krimen.
Ngem naamwan nga idi laeng napan a bulan ti Setyembre, base iti desisyon ti huwes, inabsuwelto na iti kaso a murder iti maysa a health worker idiay Cordillera, a ni Rachel
Mariano.
Ni Mariano ket ak-akusaran ti militar a kameng ti New Peoples Army (NPA), a maipagarop nga utek iti pannaka-ambush iti 81st Infantry Battallion idi 2017 idiay Quirino, Ilocos Sur
a nakatayan ti maysa a suldado.
Maika-innem ni Bañez a napapatay a Judge iti sidong ti agdama nga administrasyon.
Ngem manipud idi July 2016, dumanonen iti aganay 43 judges, prosecutors, ken abogado iti napapatay.
