LA UNION – Nasurok 1,000 security personnels agraman dagiti force multipliers ti mai-deploy iti naduma-duma nga istratehiko a lugar ditoy probinsiya, partikular idiay ili ti San Juan, a kangrunaan a venue iti surfing competition kas paset ti maisayangkat a Southeast Asian Games (SEA) Games ditoy pagilian.
Dagiti nasao a puwersa iti mangbantay ken mangsiguro iti seguridad dagiti delegado ken bisita a sumangbay ditoy probinsiya.
Kinuna ni P/Brig Gen. Joel Orduña, agdama a Police Region One Director, awan met iti mamon-monitor da a pangta iti seguridad ditoy probinsiya para iti umadanin a kompetisyon.
Ngem impaganetget na a saan a kayat a sawen daytoy nga agkampante dan ken agbalin metten a nalukay dagiti otoridad.
Impasiguro ni Orduña nga agtalinaed a nairut ken nainget a maipatungpal iti nabukel da a security measures para iti kinatalged iti amin.
