LA UNION – Simmangpet idi kalman, Agosto 10, iti maika-21 a batch ti supply a bakuna para iti agtultuloy a vaccination program iti rehiyon uno.
Base iti impormasyon manipud DOH Region 1, pakabuklan a 54,930 doses ti Covid Vaccines ti simmangpet idi malem kalman ket dagus a naiturong dagitoy iti storage facilities sakbay a mai-deliver kadagiti lugar ditoy rehiyon.
Buklen ti nasao a bilang iti 30 a ribu a doses ti sinovac vaccines ken 24, 920 doses ti moderna vaccines.
Daytoy met iti maikadwa a batch iti Moderna Vaccines a naawat ti departamento.
Iti agdama, addan iti 792, 298 a bakuna iti na-administer wenno naitudok iti intero a rehiyon uno.
Kabayatanna, kinumpirma ti Department of Health a nakastreken ti Delta Variant ti COVID 19 ditoy Ilocos Region.
Kabilang ditoy iti nailista a lima a kaso idiay Ilocos Norte ken maysa met a kaso idiay probinsiya ti Pangasinan.
Iti baro a kaso ti virulent delta variant idiay Pangasinan ket maysa a seafarer wenno returning overseas Filipino worker, a simmangpet ditoy pagilian idi Hulyo 13.
Nagpositibo iti COVID-19 idi simmangpet ditoy pagilian, isunga naipasidong iti mandatory quarantine. Kalpasan a naka-recover iti nasao a sakit ket nagawid idiay Pangasinan idi Agosto 3.
Ngem kalpasan ti sumagmamano nga aldaw, rimuar iti panagamiris a naakaran iti Delta variant ti nasao nga OFW.
Iti naudi nga impormasyon, dagiti 20 a returning OFWs a kadwa ti seafarer a naglugan iti bus a nagawid iti bukod da met a lugar ket naipasidong da metten iti swab test ken naka-quarantine itan dagitoy.
Uray iti pamilya ti returning OFW idiay Pangasinan ket nakaipasidong ita iti 14-day mandatory quarantine.
