LA UNION – Inaklon iti detainee a ni Teofilo Lopez a naglibas kadagiti otoridad tapno dalusan ti nagan na, manipud iti akusasyon nga aglak-lako ti droga.
Ngem malaksid ti panangamin na a naglibas, amin a nakailanad iti report ti pulisiya, ket pinaglibakan daytoy.
Iti eksklusibo nga interview ti Bombo Radyo La Union kenni Lopez, kinunana a saan a pudno nga inuyekan na iti police escort daytoy, saan a pudno a nakitaan ti sintomas iti COVID 19 ket maiturong koma iti ospital tapno agpa-check up, ken saan a pudno kunana a naglibas babaen iti itatapuak na iti patrol car.
Base iti waragawag ni Lopez, naglibas idi maipagarop nga impa-in da isuna iti inwayat nga anti-drug operation ti Agoo Police idiay Barangay San Isidro, Agoo nga asideg iti pagtaengan da.
Kinuna na a naglibas agsipudta maipagarop a minulaan isuna ti droga dagiti pulis kas ebidensiya tapno maimameg iti kaso nga adda pakainaigan na iti droga.
Inakusaran na pay dagiti otoridad a pinaturongan da ti paltog kabayatan ti panagturong da iti igid ti baybay.
Nupay agtultuloy iti panangsapol dagiti otoridad iti naglibas a balud, plano na iti mangidatag ti kontra asunto kadagiti pulis.
Kinunana pay a sumuko met laeng kadagiti otoridad iti umno a panawen.
Naamwan a ni Lopez ket naipasidong iti custodiya ti Agoo Police gaputi kaso a panaglabsing iti RA 9165 wenno Comprehensive Dangerous Drugs Act of 2002.
