LA UNION – Awan ti sabali a tarigagay iti agsan-sanunong a pamilya Gurion ti Barangay Lingsat, San Fernando City, La Union nu saan a ti magun-od ti hustisiya, gaputi saan a ninamnama a pannakatay iti 22-anyos a ni Gilyore Gurion idi rabii ti Miyerkoles idiay Barangay Pagdaraoan, kalpasan paltugan dagiti saan pay a nabigbig a suspek a naglugan ti van.
Iti eksklusibo a pannakiuman ti Bombo Radyo La Union iti dua a kakabsat a babbai ti biktima nga isuda Gennelyn ken Gissele kadwa ti inada a ni Gloria, madlawan ti nakaru a liday dagitoy iti pannakatay ni Gilyore, ket nakiddaw da pay iti tulong ti Bombo Radyo tapno matiliw iti kabiitan a panawen, dagiti adda iti likudan ti krimen.
Segun kenni Gennelyn, addan iti kopya ti pulisiya iti CCTV footage iti lugar a nakapasamakan ti krimen, ket daytoy ita ti maad-adal para iti pakabigbigan dagiti suspek.
Kiniddaw na pay iti tulong dagiti tattao a nakakita iti pasamak a mangipaay ti impormasyon kadagiti otoridad tapno nalaklaka da a masolbar ti kaso.
Inladawan da ni Gilyore a nasingpet ken naragsak a tao ken awan met kuna da iti naibagbaga na nga atraso na iti sabali a tao.
Ni Gilyore ket maysa a PSA Enumerator ngem naaddaan ti sideline a panaglako ti barbecue iti Barangay Pagdaraoan, maysa a lawas pay laeng ti napalabas.
Dagus a natay ni Gilyore gaputi tama ti bala ti paltog iti barukong na, malaksid laeng ti tama iti saka daytoy.
Malam-lamayan itan iti pagtaengan da ni Gilyore ken segun iti pamilya na, maitabon ti bangkay inton Lunes, Oktubre 13.
Iti agdama, agtultuloy iti nairut nga imbestigasyon dagiti otoridad para iti pannakasolbar ti krimen.
