LA UNION – Nanayunan pay ti bilang dagiti Overseas Filipino Workers (OFWs) ditoy Region 1 a napaawid ken inasistaran ti Overseas Workers Welfare Administration Region 1 (OWWA Region 1) gapu iti agtultuloy a pandemya iti Covid-19.
Base iti kauddian a datos a nakalap ti Bombo Radyo La Union manipud OWWA Region 1, umaboten iti 19, 047 nga Returning Overseas Filipinos (ROF) iti nakaawid ditoy rehiyon sipud idi Marso 18 ti agdama a tawen.
Kabilang iti nasao a bilang dagiti 10,420 manipud Pangasinan; 3, 598 ditoy La Union; 2,906 idiay Ilocos Sur; ken 2,123 idiay probinsiya ti Ilocos Norte.
Dagiti maipapaay a tulong kadagiti ROF ket ti libre a transportasyon, accomodation, taraon ken koordinasyon kadagiti provincial government ken LGUs.
Agtultuloy iti nasao a programa ti OWWA kadwa da iti dadduma pay nga ahensiya ti gobyerno tapno tulongan dagiti umili a Pilipino a makaawid ditoy pagilian, kalpasan a napukawan dagitoy ti panggedan idiay abroad gapwanan ti COVID 19 pandemic.
