LA UNION – Aglugan koman iti barko iti 43-anyos a seaman a residente ti Barangay Maragayap idiay ili ti Bacnotan ngem napurnada kalpasan a nagpositibo iti sakit a coronavirus.
Base daytoy iti resulta ti Covid 19 rapid plasma reagin (RPR) test a rimuar idi June 23, 2020.
Immuna ti daytoy, idi June 22 ket nagturong ti pasyente idiay Manila para iti pre deployment medical examination ngem kas protocol, naalaan daytoy ti blood test ket iti resulta na, nagbalin a positibo iti COVID 19.
Asymptomatic iti pasyente ken naka-isolate ita idiay Balaoan District Hospital.
Iti eksklusibo nga interview ti Bombo Radyo La Union kenni Mayor Francisco Fontanilla, kinumpirma na a saan pay nga ammo nu sadino iti nakaalaan ti pasyente iti virus, agsipudta idi pay met Pebrero a simmangpet ditoy probinsiya ti nasao a seaman ket nagpositibo laeng idi nagturong idiay Manila.
Iti agdama, maisay-sayangkat ti naipinget a contact tracing kadagiti naka-close contact ti pasyente ken dadduma pay a lugar a nagturongan daytoy.
Kabayatanna, iti Barangay Maragayap, Bacnotan ket saan a naipasidong iti lockdown ngem malimitaran ti panagruar dagiti residente tapno ma-contain iti panagwaras ti coronavirus.
