LA UNION – Nainget a kondinaren ti konseho munisipal idiay ili ti Bauang iti naaramid a kinadamsak ken panangpapatay iti Association of Barangay Captains wenno (ABC) President ken Barangay Kapitan ti Pagdalagan Sur a ni Noel ‘Wowie’ Gallardo.
Iti eksklusibo nga interview ti Bombo Radyo kenni Sangguniang Bayan Member Danilo Abuan, kinuna na a malidayan ken masayangan da iti saan a ninamnama a pannakatay ni Gallardo, nga ibil-bilang da kas ‘man in action’ kadagiti nai-atang kenkuana a trabaho.
Gaputi dayta, awan ti sabali a tarigagay da nu saan a makemmeg iti kabiitan a panawen iti suspek, tapno maipaay ti hustisiya iti pannakatay ti opisyal.
Impaganetget ni Abuan, nga awan ti karbengan ti siasinuman a mangkettel iti biag ti maysa a tao, anyaman ti nagbalin a basol daytoy.
Makuna a close range wenno deppel iti panangpaltog iti biktima, base iti report ti Bauang Police Station.
Simrek ti bala ti paltog iti panga ken limsut iti tengnged ti biktima.
Napasamak ti pammaltog iti uneg ti e-games casino iti maysa a resort ti nasao nga ili agarop alas-7:00 idi rabii.
Iti suspek a nabigbig a ni Jeffrey Escobal a maipagarop a tubo ti Aurora, Isabela ket naglog-in (base iti log book) idi November 9 iti nasao a resort isunga mamati ni konsehal Abuan a minanmanan ti suspek iti garaw ni Gallardo sakbay a naisayangkat iti krimen.
Ngem segun kenni Abuan, awan iti nadak-dakamat kadakuada ni Gallardo nga adda pangta ti biag na.
Kinuna na a naragsak da pay a nagkakadwa iti naudi a sesyon dagitoy iti konseho idi aldaw ti Miyerkoles, Nobyembre a-13.
Ni Gallardo ket umuna a termino na kas nabotosan nga ABC President idiay Bauang ngem maudi koman a termino na kas kapitan iti barangay da.
