Uppat a testigo iti iprisenta ti kampo ni Vice President Sara Duterte iti panagtultuloy ti impeachment proceedings iti Senado inton Nobyembre 19 ken 20.

Karaman ditoy ni Atty. Rainer Dela Fuente ti AML Consulting PH, a mangipalawlawag kadagiti probisyon ti Anti-Money Laundering Act (AMLA).

Dakamaten met ni Department of Trade and Industry (DTI) Undersecretary Ceferino S. Rodolfo iti panagparehistro ti Cale88 Foods Corporation iti Board of Investments.

Ilawlawag ni Food and Drug Administration (FDA) official Pilar Marilyn M. Pagayunan iti panagparehistro ti sweetened banana chips ti kumpanya ken dagiti dokumento a naisubmitir para iti daitoy.

Kabayatanna, manamnama a mangipila ni Rowena G. Mendoza, pannakabagi ti Center for International Expositions and Missions (CITEM), dagiti komunikasyon ken imbitasyon a naipatulod iti Cale88 mainaig kadagiti food exposition.

Segun iti Depensa, tarigagay dagiti testimonya ken dokumento a sungbatan dagiti alegasyon iti sidong ti Article II ti impeachment complaint, partikular iti maipagarop a saan a mailawlawag a baknang, dagiti deklarasyon iti Statement of Assets, Liabilities and Net Worth (SALN), ken interes iti negosyo ti bise presidente.

Kinumpirma ni Senate Secretary Renato Bantug Jr. a naipatuloden babaen iti elektroniko a wagas dagiti subpoena iti uppat a testigo.

Maipalagaip nga imbabawi ti Depensa iti 16 nga opisial ti bangko nga immuna da nga inlista kas testigo.

Immuna metten nga inyanunsiyo iti plano a sumango dagiti walo agingga 10 a testigo iti panagusig.