LA UNION – Makita itan ti panagado dagiti turista uppat nga aldaw sakbay ti Sabado de Gloria, idiay ili ti San Juan, partikular iti aplaya ti Barangay Urbiztondo a pagaammo kas maysa kadagiti kangrunaan a surfing ken beach tourism destinations ti Northern Luzon.
Segun kadagiti nakauman ti Bombo Radyo a bisita, kaaduan kadagitoy ket naggapu idiay Manila ken kabangibang a lugar. Inbinglayda nga inggagarada ti simmarungkar ditoy probinsya tapno agrelax ken agbakasion sakbay ti pannakarambak ti Holy Week. Malaksid iti panaginana, kayatda pay a padasen dagiti nalatak a dalluyon ken ti natalna nga aglawlaw ti San Juan.
Maysa kadakuada ni Renz Cruz manipud idiay Taytay, Rizal. Kenunana, nangipaayda ti panawen a simmarungkar idiay San Juan sakbay nga agsublida idiay Manila, a pakarambakan ti Holy Week. Kinunana a paset ti tradisionda iti Visita Iglesia, maysa a narelihiosuan nga aramid a pakasarungkaran dagiti tattao iti nagduduma a simbaan kas wagas ti panangyanninaw ken panagbabawi kadagiti basbasol.
Innayon ni Cruz a saan a daytoy ti umuna a panagbisitana ditoy probinsya. Kinapudnona, namin-adun a nagsubli iti lugar ket tunggal gundaway ket nagtalinaed a positibo ti kapadasanna. Inbinglayna pay a ditoyna a naam-ammo ti asawana, isu nga ad-adda pay nga espesial ti panagsublina.
Kabayatanna, namnamaen ti lokal a gobierno ti San Juan nga agtultuloy nga umadu ti bilang dagiti turista bayat nga umas-asideg ti peak ti Holy Week. Gapu iti daytoy, maipalagip kadagiti bisita a surotenda dagiti maipatungpal a pagalagadan iti kinatalged, kinadalus, ken kinaurnos kadagiti publiko a lugar, nangruna kadagiti aplaya. (Report by Bombo Ericka)
