BR LA UNION – Inyanunsyo ni US President Donald Trump a pumanawen ti Estados Unidos iti World Health Organization (WHO).
Gaputi daytoy iti biddut a panangimaton ken saan a nasayaat a panangimanehar ti ahensya iti COVID-19 pandemic ken dadduma pay a krisis pangsalun-at iti intero a lubong.
Naamwan a ti Estados Unidos iti kadackelan a fund contributor iti WHO, mangipapaay ti aganay 18% iti pakabuklan a pondo daytoy.
Segun kenni Trump, napaay iti WHO nga agtignay a nawaya manipud iti saan a maiparbeng nga impluwensya pampulitika dagiti miyembro nga estado ti WHO.
Imbaga na pay a saan a naingkalintegan dagiti dadackel a binay-bayadan ti Estados Unidos, idinto a saan a pulos a maitukad iti it-ited ti dadduma a pagilian a kas ti China.
Epektibo ti panagikkat ti Estados Unidos iti United Nations health agency iti uneg ti 12 a bulan.
Kaipapanan daytoy a maisardeng amin a pinansyal a kontribusyon kadagiti programa ken ganwat ti ahensiya.
Idi 2020, bayat ti umuna a termino na kas Presidente, nangaramid ti addang tapno umikkat iti ahensya, kalpasan nga inakusaranna iti WHO a tumul-tulong iti China tapno allilawen ti lubong seknan iti pudno a nagtaudan ti COVID.
Banag a pinaglibakan ti WHO iti nasao nga akusasyon ken imbaga na nga agtultuloy a pil-piliten ti Beijing a mangibinglay ti datos tapno madetermina nu iti COVID ket naiyakar iti tao manipud ayup wenno nagtaud iti lokal a laboratoryo a pakaam-amirisan dagiti virus.
