Inruaren ti United States court iti sentensiya para ti administrator ti Kingdom of Jesus Christ (KOJC) sadiay Los Angeles, California a ni Marissa Duenas.
Nag-plead guilty ni Duenas para ti kaso na a visa fraud idiay Estados Unidos ken ti panagpeke kadagiti kasar dagiti miembro da ti simbaan tapno maaddaan ti legal nga estado iti nasao a pagilian.
Imbilin ni Judge Terry Hatter ti US District Court, Central District of California iti madagdagos a commitment ni Duenas sadiay Bureau of Prisons.
Segun kadagiti records ti korte, napagserbianen ni Duenas ti impaulog ti korte a tawen a pannakabalud na isu ket napalubosanen daitoy ngem subject latta iti supervision iti uneg ti dua a tawen.
Babaen ti supervised release, nasken a suroten ni Duenas amin a kondisyon ti korte. Strikto payen a mapawilan ni Duenas ti panagaramid ti aniaman a krimen wenno panaglabsing ti aniaman a local, state wenno federal laws.
Maipalagip a ni Duenas ket nagserbi kas human resources leader ti KOJC idiay Estados Unidos. Isuna pay ti reponsable para ti panagkolektar ken panangidulin kadagiti pasaporte ken dokumentos nga adda pakainaigan na ti immigration dagiti miembro ti sekta da.
Isuna pay ti nag-asikaso ti proseso dagiti peke a kasar ken student visas tapno agtalinaed a mangmangged ti estado dagiti miembro idiay Estados Unidos ken makakikil ken agbalin nga agdadawat ti donasyon kadagiti tattao.
Inarestar ti Federal Bureau of Investigation (FBI) ni Duenas karaman ti maysa pay a KOJC administrator a ni Guia Cabactulan idi tawen 2020 sadiay KOJC headquarters.
