LA UNION – Napinget ti laban iti Presidential Election idiay Amerika, iti baetan da Vice President Kamara Harris ken former president Donald Trump.
Iti pannakiuman ti Bombo Radyo La Union kenni Bombo International News Correspondent Allan Rogelio M. Sobrevilla Jr., manipud Las Vegas, Nevada, USA, kinuna na a dikit ti laban dagiti dua, kas maibasar iti online poll a nairuar ti resulta na, rabii sakbay ti election day .
Iti national poll a nairuar idi rabii ti Lunes, lamang ni Harris 49% kumpara iti 48% a pabor kenni Trump.
Aminado ni Sobrevilla a dackel ti impact iti Pilipinas ti agbalin a resulta ti eleksiyon idiay Estados Unidos.
Kinuna na a nakasadag iti sumaruno nga agbalin a Presidente, nu maitultuloy dagiti maipapaay a tulong wenno US aid para iti Pilipinas, dagiti programa iti baetan ti dua a pagilian a mang-benipisyar kadagiti professional filipino workers, ekonomiya, malaksid laeng iti military defense a nakailanad iti Visiting Forces Agreement.
Namnamaen ni Sobrevilla, a siasinuman ti mangabak kada Harris ken Trump, ket matulonganna iti Pilipinas a dumur-as iti tay-ak ti teknolohiya, medisina, ken edukasyon.
