Nakitaripnong idiay Kyiv da U.S. special envoys Steve Witkoff ken Jared Kushner kenni Ukrainian President Volodymyr Zelenskyy, kas paset ti baro a diplomatiko a panangiduron ti Estados Unidos a mangitandudo iti panagpatingga ti gubat iti nagbaetan ti Ukraine ken Russia.
Iti panagsarita ket naisayangkat maysa nga aldaw kalpasan a nakipagkita da Witkoff ken Kushner kenni Russian President Vladimir Putin idiay Moscow, a sadiay a napagsasaritaan dagiti posible a sumaruno nga addang para iti peace settlement.
Inladawan da Witkoff ken Zelenskyy iti nagbalin a diskusion idiay Kyiv a napateg, bayat nga inyebkas iti dasig ti Ukraine iti kinasaganada a mangituloy dagiti negosasion. Karaman kadagiti napagsasaritaan iti security at economic guarantees, air defense ken energy support, kasta met dagiti plano para iti panagbangon ti Ukraine kalpasan ti gubat.
Dimmar-ay met iti maikadua a paset ti panagtaripnong dagiti national security advisers manipud United Kingdom, France ken Germany kas panangipakita ti suporta iti Ukraine.
Iti laksid dagiti diplomatic engagements, nagtultuloy iti panarinnaut iti nadumaduma a paset ti Ukraine ken Russia, karaman dagiti panangraut babaen ti panangusar dagiti drones. Awan ti naipakaammo a dagus a panagballigi wenno pinal a katulagan iti kinakappia kalpasan dagiti panagtaripnong.###
