Nangipatulod ti tulong iti Estados Unidos kadagiti residente ti Manay, Davao Oriental a naapektaran ti nagsaruno a magnitude 7.4 ken 6.8 a gingined idi Biyernes.
Segun ti US Embassy, karaman iti naipatulod nga ayuda ti nasurok 137,000 family food packs ken 500 emergency shelter kits.
Kenuna ni US Ambassador MaryKay Carlson a makikokoordinar dan iti Department of Social Welfare and Development (DSWD) tapno maamwan pay iti kanayunan a kasapulan dagiti naapektaran.
Nangidanon met ti panakisimpatia dagiti dadduma a pagilian.
Iti nagsina a waragawag, imbaga ni Japanese Ambassador Endo Kazuya a makimaymaysa iti Japan kadagiti Pilipino nga addaan ti namnama, tibker, ken panagkaykaysa.
Impeksa met ni Australian Ambassador Marc Innes-Brown iti panangdayaw ti Australia iti “resilience ken response” ti Pilipinas iti panangsango kadagiti nagsasaruno a kalamidad.
Kabayatanna, inwaragawag met ti Chinese Embassy iti panakipagriknada kadagiti pimmusay ken iti napartak a panagbango ti Davao Region.
Maibasar iti kauddian a report ti National Disaster Risk Reduction and Management Council (NDRRMC), dumanon ti walo iti pimmusay ken 395 iti nasugatan kadagiti gingined.
Mapatta-patta met a P100.25 million iti gatad ti perdision iti imprastraktura idiay Davao Region ken CARAGA, pakairamanan dagiti 273 a nadadael nga pasilidad.###
