Nagtulagen iti Estados Unidos ken Iran a gibusan iti gubat da, segun iti waragawag ni Pakistani Prime Minister Shehbaz Sharif idi Lunes.
Segun kenni Sharif, maaddaan ti opisial a signing ceremony idiay Switzerland inton Biyernes para iti nasao a katulagan.
Pinasingkedan met daytoy ni U.S. President Donald Trump iti social media, no sadino inbaga na a nakumpleton iti katulagan iti Islamic Republic of Iran.
Nabukel ti katulagan iti baetan ti airstrike ti Israel idiay Lebanon idi Dominggo, a nakagun-od ti nakaro a pammabalaw manipud iti Iran karaman ni Trump.
Saan pay a nairuar iti kumpleto a detalye ti katulagan, ngem segun kenni Sharid, karaman ditoy iti dagos ken permanente a panagsardeng ti amin nga operasion ti militar, karaman idiay Lebanon.
Maibasar kadagiti immuna a report, manamnama a maluktan iti Strait of Hormuz, maisardeng iti blockade ti Estados Unidos kadagiti sangladan ti Iran, ken palawaen iti ceasefire bayat nga agtultuloy iti panagsarita maipapan iti nuclear program ti Iran iti uneg ti 60 nga aldaw.
Kenuna met ni Trump nga agbalin a silulukat iti Strait of Hormuz nga awan ti bayad ken malpas metten iti naval blockade ti Amerika.
Innayon na pay a mabalin nga aggunay manen iti suplay ti langis iti sangalubongan a merkado.###
