Impadamag ti U.S.Central Command (CENTCOM) ita a Sabado nga nangisayangkatda ti 10 a serye kontra iti nasurok 30 targets ti grupo nga Islamic State (ISIS) idiay Syria.
Maibasar iti report ti militar, naisayangkat dagiti nadakamat nga operasyon iti nagbaetan ti Pebrero 3 ken Pebrero 12.
Segun ti CENTCOM, partikular a pinuntirya ti Estados Unidos dagiti imprastraktura ken nakaikabilan dagiti armas ti ISIS tapno pakapsuten iti grupo.
Panggep dagiti serye ti panagraut a pagtalinaaden iti seguridad ti rehiyon ken lappedan iti panagpigsa manen ti puersa ti Islamic State.
Binomba dagiti puersa ti America dagiti kritikal nga imprastraktura ti ISIS, karaman dagiti kampo, command centers, ken dagiti pasilidad.
Nupay saan a nadakamat iti eksakto a lugar, ti operasion ket nakapamaysa kadagiti nalatak a kuta dagiti nabatbati a puersa ti Islamic State iti uneg ti teritorio ti Syria.
Segun ti report, awan ti naipadamag a nasugatan wenno natay iti dasig dagiti sundalo nga Amerikano iti pakabuklan a 10-day operation.
Laksid ti pannakaabak ti ISIS iti “caliphate” idi 2019, agtaltalinaed iti pangta dagiti “sleeper cells” daytoy idiay Iraq ken Syria, nga agtultuloy met a banbantayan ti Estados Unidos ken dagiti kaalyado a puersa.###
