LA UNION – Iti maikadwa a gundaway, in-impeach ti US House of Representatives ni outgoing President Donald Trump, gaputi ‘incitement of insurrection’ a nagramot iti napasamak a panagraut dagiti supporters na idiay US Capitol idi Enero 6.
Na-impeach ni Trump babaen iti 232 YES votes kontra iti 197 NO votes.
Manipud kadagiti 232 Representatives, 10 kadagitoy iti Republican members a kapartido ni Trump.
Dagitoy ket isuda: Representatives Liz Cheney ti Wyoming ken No. 3 leader iti House; Jaime Herrera Beutler ti Washington; John Katko ti New York; Adam Kinzinger ti Illinois; Fred Upton ti Michigan; Dan Newhouse ti Washington; Peter Meijer ti Michigan; Anthony Gonzalez ti Ohio; David Valadao ti California; ken Tom Rice ti South Carolina.
Inadaptar ti US House of Representatives iti maysa laeng nga article of impeachment, tapno kiddawen iti dagus a pannakapatakyas na iti puwesto ken iti saanen a panangipalubos kenkuana a makaiggem iti anyaman a posisyon iti gobyerno.
Nupay kasta, saan pay a masinunuo nu kaatnu a maiyallatiw ti House iti Articles of Impeachment idiay Senado para iti trial, laksid nga adda laengen nabatbati a maysa lawas, sakbay iti panagsukat ti liderato ti Estados Unidos babaen kenni President-elect Joe Biden.
